လျှောက်သောလမ်း (သားသို့ ပေးစာ – ၂)


ချစ်သောသားလေး ရဲဝဏ္ဏ



မြန်မာပြက္ခဒိန်ရဲ့ ၁ဝ လမြောက် ကိုသားသိတယ်နော်။ သား စကားတတ်စ အရွယ်ကတည်းက တန်ခူးလ သင်္ကြန်ပွဲ၊ ကဆုန်လ ညောင်ရေသွန်းပွဲဆိုပြီး ၁၂ လ ရာသီပွဲတွေကို ရွတ်ဆိုရင်း မြန်မာလတွေကို သားလေး အလွတ်မှတ်မိသွားတာမဟုတ်လား။ အဲ့သည် လတွေထဲမှာ သားသိတဲ့ ပြာသိုလရဲ့လပြည့်နေ့ကို ဖေဖေတို့ နိုင်ငံမှာ အမေနေ့လို့ သတ်မှတ်ခဲ့တယ်။
အမေနေ့ဆိုတာ ဖြစ်လာဖို့အတွက် ကွယ်လွန်သူ ရုပ်ရှင်ဒါရိုက်တာကြီး၊ စာရေးဆရာကြီး ဘဘဦးသုခ က အဓိက ဦးဆောင်လှုပ်ရှားခဲ့တာပေါ့ သားရယ်။ ” အမေ ..”ဆိုတဲ့ ရင်တွင်းလှိုက်သံကြီးနဲ့ ဘဘ ဦးသုခက အမေရဲ့ ဂုဏ်ကျေးဇူးတွေကို ရွတ်ပြလိုက်တာ မှာ ဖေဖေတို့ နှလုံးသားမှာ နင့်နင့်နဲနဲဖြစ်အောင် ခံစားလိုက်ရတာပါပဲ။ ”အမေဟာ မိန်းမရွှင်ဖြစ်နေပါစေ ကျွန်တော့်အတွက်တော့ အမေဟာ အမေပါပဲ” ဆိုတဲ့ စကားကတော့ ဖေဖေတို့ နားထောင်ရသူတွေရဲ့ နှလုံးသားသွေးထဲကို စီးဝင်သွားစေတာပေါ့ သားရယ်။ မိခင် မေတ္တာတွေကတော့ ပြောလို့မကုန်ဘူးပေါ့သားရယ်။
မဟောသဓာဇာတ်တော်ကြီးမှာ နတ်သမီး ပုစ္ဆာမေးခွန်းဆိုတာ ရှိတယ် သား ။ ထီးချက်စောင့်နတ်သမီးက ဘုရင်မင်းကြီးကို မေးခွန်းထုတ်ခဲ့တဲ့ ပုစ္ဆာ ၄ ပုဒ် ထဲမှာ မေးခွန်း(၁)က … လက်ဖြင့်လည်းကောင်း၊ ခြေဖြင့်လည်းကောင်း ရင်၊ မျက်နှာစသည်တို့၌ ပုတ်ခတ်၏ ထိုသို့ပုတ်ခံရသော သူပင် ပုတ်ခတ်သူကို အလွန်ချစ်မြတ်နိုး၏။ ထိုသူကား ဘယ်သူလဲ ဆိုတဲ့မေးခွန်းပေါ့ …။ မင်းကြီးက မဖြေနိုင်ဘူးလေ သားရဲ့ သူ့ရဲ့သုခမိန် ပုဏ္ဏားကြီးတွေကလည်း တလွဲတွေဖြေနေကြတာပေါ့။ နောက်ဆုံးတော့မဟာပညာရှိ မဟော်သဓာသုခမိန်ကို မေးမြန်တော့မှ အဖြေက သားနဲ့မိခင်တဲ့ …။ ၂ လ ၃ လသားအရွယ် သားကမိခင်ကို ခြေနဲ့ကန်လိုက်၊ လက်နဲ့ပုတ်လိုက်နဲ့ လှုပ်ရှားဆော့ကစားတာကို မိခင်ဖြစ်သူက ကြည်နူးလို့ မဆုံးတာကို ဆိုလိုတာလေ …။ ဒါဟာ မိခင်ရဲ့ ချစ်ခြင်းမေတ္တာကို ဖော်ညွှန်းလိုက်တာပဲပေါ့။
သားလေး ရဲဝဏ္ဏရေ …ရုပ်သံဇာတ်လမ်းတွဲတွေ၊ မြန်မာဗီဒီယိုဇာတ်ကားတွေမှာ ယောက္ခမဆိုတဲ့ နေရာက သရုပ်ဆောင်ရတဲ့ ဇာတ်ပို့ကြီးတွေခမျာ သားမက်၊ ချွေးမလုပ်သူကို အမျိုးမျိုးအနိုင်ကျင့်ပြ၊ မာန်မဲ ဆူပူပြနဲ့ … ဖေဖေတော်တော် စိတ်ပျက်တယ်သား။ မိခင်ဆိုတာကို မေ့ထားကြတယ်။ မိခင်ရဲ့မေတ္တာတွေကို သေးသိမ်အောင်လုပ်ပစ်ကြတယ်။ ယောက္ခမဆိုမှတော့ သားရဲ့အမေ ဒါမှမဟုတ် သမီးရဲ့အမေဖြစ်ပြီပေါ့။ သူဟာမိခင်ပဲလေ …။ ဇာတ်နာအောင်ဖန်တီးကြတာတွေပေါ့။ သားတို့လူငယ်တွေ အမြင်မှား၊ အထင်မှားမှာ စိုးရိမ်လို့ ဖေဖေပြောလိုက်တာပါ။
အမေတွေရဲ့ မေတ္တာကို ပြောရရင်တော့ မြင့်မိုရ်တဲ့၊ အနှိုင်းမဲ့တဲ့ ဟုတ်တာပေါ့သားရယ်။ ဘယ်လိုမှ နှိုင်းယှဉ်လို့ မရနိုင်အောင် မြင့်မားကြီးမြတ်လွန်းတာကို။ နောက်ပြီး ထပ်ပြောချင်တာက မိခင်တိုင်းဟာ သူတို့ ရဲ့သားသမီးတွေကို ကမ္ဘာပေါ်မှာ အလှဆုံးလို့ထင်ကြတာသားရဲ့။ ဖေဖေဖတ်ဖူးတဲ့ ခေတ်သစ်ပုံပြင်လေး သားကို ပြောပြရအုံးမယ်။ ဆရာ ဖေလင်းသစ် ရေးတဲ့ ပုံပြင်တွေထဲကတစ်ပုဒ်ပေါ့။ ဆရာ ဖေလင်းသစ်က အင်တာနက်မှာ ဖေါ်ပြထားတဲ့ ကောင်းနိုးရာရာပုံပြင်သစ်လေးတွေကို မော်ဒန်ဂျာနယ်မှာ အပတ်စဉ်ရေးတာလေ…။ အခုပြောမဲ့ပုံပြင်လေးက ကျီးကန်း မေမေတဲ့။
သစ်တောအုပ်တစ်ခုမှာ ကြက်တူရွေး မေမေဟာ သူ့နှုတ်သီး ကောက်ကောက်မှာ အထုပ်တစ်ထုပ် မသယ်ပြီး တောအုပ်ထဲကနေ ခပ်သုတ်သုတ် ပျံသန်းလာသတဲ့။ ပြီးတော့ ကျီးကန်းမေမေရဲ့ နှုတ်သီးမည်းမည်းမှာလည်း အထုပ်တစ်ထုပ်ချီထားသတဲ့။ ”ကျွန်မသားလေး ကျောင်းသွားတာ မနက်က ထမင်းချိုင့် မမီလိုက်လို့ပါ။ ကျွန်မလေ ဒီနေ့ အလုပ်သိပ် များနေလို့ပါ။ သစ်တောအုပ် ကျောင်းကိုသွားမယ့်အတူတူ ကျွန်မကလေးအတွက် ထမင်းထုပ်ယူသွားပေးပါနော်” လို့ ကြက်တူရွေးမေမေက ကျီးကန်းမေမေကိုပြောသတဲ့ …။ ကျီးကန်းမေမေက ”ဖြစ်ပါတယ် ရှင့်ကလေးနာမည်ကို ပြောပါ” ဆိုတော့ ကြက်တူရွေးမေမေက ”မခက်ပါဘူးရှင်၊ တစ်ကျောင်းလုံးမှာ အချောဆုံးငှက်ကလေးဟာ ကျွန်မကလေးပေါ့”လို့ ပြန်ပြောသတဲ့။ ကျီးကန်း မေမေလည်း ကြက်တူရွေးမေမေရဲ့ ထမင်းထုပ်လေးယူသွားပေးပါသတဲ့။ နောက်နေ့ရောက်တော့ ဒေါသထွက်နေတဲ့ ကြက်တူရွေးမေမေဟာ ကျီးကန်းမေမေဆီရောက်လာပြီး ”ရှင် ဘာ့ကြောင့် ကျွန်မကလေးအတွက် နေ့လယ်စာထုပ်ကို မပေးလိုက်ရတာလဲ…ကျွန်မသား ချောချောလေး ခမျာ ဆာလောင်ငိုကျွေးပြီး ကျောင်းကပြန်လာတယ်” လို့လည်း ဆိုရော ကျီးကန်းမေမေက ဖြေရှင်းတယ်။
” ဒီလိုပါရှင် ကျွန်မကျောင်းကို ရောက်တော့ ရှင်ပြောသလို တစ်ကျောင်းလုံးရဲ့ အချောအလှဆုံး ငှက်ကလေးကို လိုက်ရှာပါတယ်။ ကြည့်လိုက်တော့လေ ကျွန်မသား ကျီးကန်းငယ်လေးလောက် ချောမောတဲ့သူ မတွေ့ရဘူးရှင့်။ ဒါကြောင့် နောက်ထပ်ထမင်းထုပ်ကိုလည်း အချောအလှဆုံးဖြစ်တဲ့ ကျွန်မသားလေးကိုပဲ ကျွေးလိုက်တာပေါ့ရှင်” တဲ့လေ။
သားလေး ရဲဝဏ္ဏရေ အမေဆိုတာ သူတို့မျက်လုံးထဲမှာ သူတို့သား၊ သမီးသာ အလှဆုံးလို့ ခံယူထားတာ သားရဲ့။ ဒါကြောင့် သားလေးဟာလဲ သားမေမေအတွက်တော့ ကမ္ဘာကြီးမှာရှိတဲ့ သူတွေအားလုံးထက် ချောမောလှသူပေါ့ကွယ်…။
ကဲ သားလေးရေ အမေဆိုတဲ့ (MOTHER) ကို ဝေါဟာရတီထွင်ခဲ့သူတွေက အဓိပ္ပာယ်ရှိရှိ စီစဉ်ခဲ့တာကွဲ့။ (၁၉၁၅)မှာ Yoward Jhonson ရေးခဲ့တဲ့ ကဗျာလေးတစ်ပုဒ်ကို ဖေဖေဆီလျော်အောင် ဘာသာပြန်ရှင်းပြမယ်။
M is for the million things she gave me.
အမေဟာ ကျွန်တော့်ကို ကြီးကျယ်မြင့်မြတ်မှုတွေကိုသာပေးခဲ့တယ်။

O means only that she is growing old.
အမေဟာ ကျွန်တော့်ကို လူလားမြောက်အောင် ပြုစုပျိုးထောင်ပေးတယ်။

T is for the tears she shed to save me.
အမေဟာ မျက်ရည်အပြည့်နဲ့ကျွန်တော့်ဘဝ လုံခြုံမှုကိုပေးတယ်။

H is for the heart of purest gold.ံ
အမေ့နှလုံးသားဟာ ရွှေစင်ရွှေသန့်လို အဖိုးထိုက်တယ်။

E is for her eyes with love-light shining.

အမေ့ရဲ့မျက်ဝန်းမှာ ကျွန်တော့်ကိုချစ်တဲ့ ရွှန်းလက်လက်အရောင်တွေနဲ့ တောက်ပနေတယ်။

R means right and right she’ll always be.
အမေဟာ ကျွန်တော့်အတွက် သစ္စာတရားနဲ့ အစဉ်အမြဲရပ်တည်သူဖြစ်တယ်။

ကဲ ဘယ်လောက်လေးနက်သလဲ…အမေတွေရဲ့ နှိုင်းမရတဲ့ မေတ္တာကို သားသိပါတယ်နော်…။ မိခင်ရဲ့ ဂုဏ်ကျေးဇူးကို မမေ့အပ်သော သားသမီးတို့ဟာလဲ မိခင်ရဲ့အေးမြတဲ့ မေတ္တာကြောင့် ဘဝတစ်လျှာက်ပန်းခင်း လမ်းလျှောက်ရသလို ဖြစ်တော့မှာပေါ့။
ချစ်သောသားလေး ရဲဝဏ္ဏ မိခင်ရဲ့မေတ္တာဖြင့် ခင်းထားသော ပန်းခင်းလမ်းမှာ ထာဝရ လျှောက်လှမ်းနိုင်ပါစေ။


ချစ်သောဖေဖေ
ရဲသျှမ်း

No comments:

Post a comment