'' ဆူးများ ''

( တစ် )

လွန်ခဲ့သော နှစ် ၃ဝ ဝန်းကျင်ကဖြစ်ပါသည်။

ဟိုတုန်းက အခေါ် မန္တလေးဝိဇ္ဇာသိပ္ပံတက္ကသိုလ် MASU (Mandalay Arts and Science University) မှာ ဘူမိဗေဒဘာသာရပ် အထူးပြုယူခဲ့သော ကျွန်တော်တို့နယ်ကျောင်းသားအများစုက ရွှေပြည်အေးအဆောင် တွင်နေရာရပါသည်။ MASUမှာ ရွှေပြည်အေး၊ အောင်မင်္ဂလာတို့က အဆောင်ကြီးများဖြစ်ပြီး (၂)ယောက်ခန်းများနှင့် ဖွဲ့စည်းထားပါသည်။ နဒီ၊ ရတနာပုံ၊ စပါးဝါ၊ ဇေယျာအဆောင်တို့က အခန်းဖွဲ့မရှိ Hall type ဖြစ်သည်။ ပထမနှစ်၊ ဒုတိယနှစ် ကျောင်းသားအများစုနေရသော အဆောင်များဖြစ်ပါသည်။ အောင်မင်္ဂလာ၊ ရွှေပြည်အေးတို့ကတော့ တတိယနှစ်နှင့် နောက်ဆုံးနှစ်ဖိုင်နယ်ကျောင်းသားများအတွက် ဖြစ်သွား ပါသည်။

ကျွန်တော်က ရွှေပြည်အေးဆောင်အောက်ထပ် ရေးချိုးခန်းတွေဖက်က အခန်းကိုရွေးချယ်လိုက်ပါသည်။ ကျွန်တော်တို့က ဒေသကောလိပ်ကနေ ဒုတိယနှစ်အောင်ပြီးတတိယနှစ်မှ MASU ကိုပြောင်းလာရသည်ဆိုတော့ ကျွန်တော်တို့လည်း စတုတ္ထနှစ်ရောက်ရော တက္ကသိုလ်ကြီးမှာက တတိယနှစ်၊ စတုတ္ထနှစ်(၂)တန်းနှင့် မာစတာ ကျောင်းသား၊ ကျောင်းသူတစ်ချို့သာ ကျန်ရှိပါတော့သည်။ ပျားပန်းခတ်မျှ စည်ကားလှသော ကျောင်းတော်ကြီး ကား ကျောင်းသားဦးရေထက်ဝက်လျော့ကျသွားခြင်းပဲဖြစ်ပါသည်။ သည်တော့ ရွှေပြည်အေး၊ အောင်မင်္ဂလာ အဆောင်ကြီးများမှာ ကျွန်တော်တို့နောက်ဆုံးနှစ်ကျောင်းသားများသာရှိပြီး ကျွန်တော်တို့အခေါ် တဲဆောင်များ ဖြစ်သည့် နဒီ၊ စပါးဝါနှင့် ရတနာပုံ၊ ဇေယျာ ဆောင်တို့မှာ တတိယနှစ်ကျောင်းသားများထားရှိလိုက်ပါသည်။ ပထမနှစ်၊ ဒုတိယနှစ်ကျောင်းသားများကတော့ ဒေသကောလိပ်အသီးသီးမှာ တက်ရတာပဲဖြစ်သည်။ ကျောင်းသားတွေနည်းသွားတော့ ရွှေပြည်အေးနှင့် အောင်မင်္ဂလာမှာ အခန်းတွေပေါများပြီး ကျွန်တော်တို့တတွေ တစ်ယောက်တစ်ခန်း နေခွင့်ရသွားခဲ့ပါသည်။ ရေချိုးခန်း၊ ရေအိမ်သာတွေဖက်မှာ ညညကျ ''ကျောပေါက်'' ကြီးဆိုသည့် သရဲရှိသည်ဟု လက်ဆင့်ကမ်းပြောခဲ့သော နောင်တော်ကျောင်းသားများ၏စကားကို ပြက်ရယ်ပြု ခဲ့သည့် ဘယ်သူမှ မနေချင်မနှစ်မြို့သောအခန်းကိုမှ ကျွန်တော်ရွေးချယ်ခဲ့ပါသည်။ ကျွန်တော့်လိုပဲ ကိုဇင်မော်၊ ကိုဝင်းတင့်၊ ကိုစိုးမြင့် စသည့်စာပေအနုပညာခုံမင်သူတို့ကလည်း အေးအေးဆေးဆေးနေရသည့် ချောင်ကျကျ ကျွန်တော့်အခန်းနှင့်ကပ်လျက်အခန်းတွေကိုပဲ ရွေးချယ်ခဲ့ကြပါသည်။ ဒေးကျောင်းသားတွေဖြစ်ကြသော ကိုကိုထွေး၊ အောင်ကြီး၊ အောင်နိုင်မြင့်၊ ကိုညို၊ ကျော်စိုးဝင်း၊ မောင်မောင် စသည့် စာသမားများကလည်း ကျွန်တော်တို့အခန်းမှာ လာစုကြသည်။ သည်တော့ ကျွန်တော်တို့၏ ရွှေပြည်အေး ဆောင် ရေချိုးခန်းဘက်အခန်း တစ်ဝိုက်ကတော့ ကဗျာရေးဖွဲ့သူ၊ ဝတ္ထုတို/ရှည် ရေးဖို့ကြိုးစားနေသူ၊ ပန်းချီကား တွေ အမြောက်အများဆွဲ လေ့ကျင့်နေသူတို့၏ ရိပ်မြုံလေးတွေ ဖြစ်မှန်းမသိဖြစ်လာပါသည်။

ကျွန်တော်တို့ကျောင်းသားဆောင်တွေတင်မဟုတ်ဘဲ ကျောင်းသူဆောင်များဖြစ်သော မြတမာ၊ သစ္စာ၊ ရွှေမန်းဆောင်တို့မှာလည်း ကျောင်းသူများအနည်းအကျဉ်းသာရှိပါတော့သည်။ မန္တလေးနှင့်အလွန်းနီးသော ကျောက်ဆည်၊ စဥ့်ကိုင်တို့မှ ကျောင်းသူများပင် အဆောင်နေခွင့်ရသည်အထိ ကျောင်းသား/သူ အင်အား နည်းသွားခဲ့ပါသည်။

ဆရာတင်မိုး၊ ဆရာမောင်စွမ်းရည်၊ ဆရာကြည်အောင်၊ ဆရာကိုလေး(အင်းဝဂုဏ်ရည်)တို့ ကဗျာချိုချိုလေးများ ဖွဲ့ခဲ့သော ရေနီမြောင်းလည်းမစည်ကားတော့။ ရာဇာတ် စာကြည့်တိုက်မှာလည်း စာဖတ်သူတွေသိပ်မရှိ၊ အင်းဝဟောမှာလည်း စာတမ်းဖတ်ပွဲ၊ စာပေဟောပြောပွဲတွေ ဆိတ်သုဉ်းခဲ့လေသည်။ သို့ပေမယ့်လည်း ဘူမိကျောင်းသားတို့၏ ကျောက်ရိုင်း၊ ရူပဗေဒကျောင်းသားကျောင်းသူများ၏ ဟင်းလင်းပြင် နံရံကပ်စာစောင် များကတော့ ကျောင်းမဂ္ဂဇင်းတစ်အုပ်အလား အရောင်းအသွေးစုံ၊ ကဏ္ဍစုံဖြင့်ထင်ရှားခဲ့ပါသည်။ နံရံကပ် စာစောင်ကို လနှင့်ချီပြသနိုင်ခဲ့ခြင်းကိုက အနုပညာအရည်အသွေး၊ စာအဆင့်အတန်းမနိမ့်ကျခဲ့တာကြောင့်ဟု အားပြည့်အင်ပြည်ြ့ဖင့် ရဲတင်းစွာပြောရမှာပဲဖြစ်သည်။

x x x x x

ရွှေပြည်အေးဆောင် အခန်း(၃၄)မှာ ကျွန်တော် ရှိနေသည်။ ကျွန်တော့်အခန်းမှာ စာအုပ်တွေအများကြီး ရှိပါသည်။ ကျွန်တော် နောက်ဆုံးနှစ်ကျောင်းသားဖြစ်တော့ အဖေက တစ်လ ၄ဝဝ ကျပ်ပို့ပေးပါသည်။ အဆောင်လခ ၁၂ဝ ကျပ်၊ ကျောင်းလခ ၃ဝ ကျပ်၊ မေဂျာကြေး အသင်းအဖွဲ့ကြေးက ၁ဝ ကျပ်လောက်ဆိုတော့ ကျွန်တော် သက်ဆိုင်ရာအလိုက်ငွေးသွင်းပြီးချိန်မှာ ၂၄ဝ ကျပ် အပိုထွက်နေပါသည်။ လစဉ်ထုတ် မဂ္ဂဇင်းထဲက မိုးဝေနှင့် ရှုမဝ ဝယ်လိုက်တာက ၁၃ ကျပ်ပဲကျသည်။ ဘာပဲဖြစ်ဖြစ် လစဉ် ၄ဝ ကျပ်ဖိုးခန့်တော့ စာအုပ်ဝယ်ဖြစ် ပါသည်။ ကိုစိန်မိုး၊ ဥတ္တရလွင်ပြင်၊ ကိုသန်းဌေး၊ ဒေါင်းအိုးဝေ၊ ကိုထွန်းထွန်းတို့၏ စာအုပ်ဆိုင်များမှာ အဟောင်း၊ အကောင်းလေးတွေအများကြီးမို့ ကျွန်တော့်မှာ စာအုပ်အများကြီးစုဆောင်းလိုက်နိုင်ပါသည်။ ကျွန်တော်က စာအုပ်တွေကို ဝယ်စုရတာဝါသနာပါပြီး စာအုပ်များကို ငှားရမ်းဖို့မှာလည်း မတွန့်တိုတတ်ပါ။ သည်တော့ ကျွန်တော့်အခန်းလေးထဲမှာ ဆရာဒဂုန်တာရာရှိသည်။ လူထုဦးလှ၊ လူထုဒေါ်အမာသမီးခင်ပွန်းရှိသည်။ ဒေါက်တာသန်းထွန်းရှိသည်။ ဒေါ်ခင်ဆွေဦးရှိသည်။ မိုးမိုး(အင်းလျား)ရှိသည်။ မစန္ဒာရှိသည်။ သိန်းသန်းထွန်း ရှိသည်၊ ချစ်ဦးညိုရှိသည်။ နိုင်ဝင်းဆွေရှိသည်။....ရှိသည်။ စားပွဲပေါ်မှာ၊ စာအုပ်စင်လေးမှာ၊ ကုတင်ဘေးမှာ စာအုပ်တွေအထပ်လိုက်ရှိနေခဲ့သည်။ နောက်ဆုံးနှစ်စာမေးပွဲဖြေဆိုပြီးမှ မိဘရပ်ထံပြန်သယ်ရမည့် စာအုပ်တွေ ပဲဖြစ်ပါသည်။ ကျွန်တော်က ကျွန်တော့်အခန်းကို စာကြည့်တိုက်အငယ်စားလေးတစ်ခုအဖြစ် ရည်ရွယ်ခဲ့ပါသည်။ ဤသည်ကပင် ကျွန်တော်၏ မိုက်မဲမှုဖြစ်သည်ဟုထင်ပါသည်။

x x x x x

တစ်ရက်မှာတော့ ကျွန်တော့်အခန်းထဲသို့ တစ်ခြားမေဂျာမှ ကျောင်းသားတစ်ယောက်ဝင်လာပြီး စာအုပ် ငှားပါသည်။ ကျွန်တော် ကြည်ဖြူစွာပဲ ကြိုက်တဲ့စာအုပ်ငှားသွားဖို့ ခွင့်ပြုပေးခဲ့ရာ ထိုကျောင်းသားက ရှုမဝ မဂ္ဂဇင်းငှားသွားပါသည်။ တစ်ဆောင်တည်းနေသော်လည်း မေဂျာမတူသည့်အပြင် အပေါ်ထပ်အခန်းမှ ဖြစ်တာကြောင့် ရင်းရင်းနှီးနှီးရှိလည်း မရှိလှပါ။ သို့သော်စာအုပ်ငှားသည့်ကိစ္စအပေါ်မှာတော့ ကျွန်တော်အနှမျော မရှိခဲ့ပါ။ စာဖတ်လိုသူအတွက် ဖတ်လိုသောစာအုပ်တစ်အုပ်ငှားရမ်းပေးနိုင်သော ပီတိကို ကျွန်တော်ခုံမင်ခဲ့ ပါသည်။ သို့သော် ¤င်းပီတိကား ခါးသက်သော၊ အော့နှလုံးနာစရာဖြစ်သော အစိုင်အခဲဖြစ်သွားခဲ့ပါသည်။

ရှုမဝ မဂ္ဂဇင်း စာအုပ်ငှားသွားပြီးနောက်ရက်မှာပဲဖြစ်သည်။ ကျွန်တော့်အဆောင်ရေအိမ်ဝင်တော့ အညစ်အကြေး သုတ်သင်ပြီးထည့်သည့်စက္ကူခြင်းထဲမှာ ရှုမဝမဂ္ဂဇင်း၏ စာမျက်နှာ ၂-၃ ရွက်ကို တွေ့လိုက်ရခြင်းပဲဖြစ်သည်။ ရေအိမ်အခန်း ၂ဝ လောက်မှာ မှ ကျွန်တော်ဝင်သောအခန်းတွင် တိုက်ဆိုင်စွာလာတွေ့တာပါပဲ။ တက္ကသိုလ် ကျောင်းသားဖြစ်သော်လည်း ရေအိမ်ဝင်တာကအစ သန့်ရှင်းစင်ကြယ်အောင် ရေမသုံးဘဲ စက္ကူသုံးသော ကျောင်းသားတွေအများကြီး ထဲမှာမှ ¤င်းကတော့ အနိမ့်ကျတကာ့အနိမ့်ကျဆုံးသူဖြစ်နေပြီကော။ ကျွန်တော့် ဒေါသဒီဂရီကတော့ အထွတ်အထိပ်ရောက်နေပါပြီ။ ရှုမဝမဂ္ဂဇင်း ငှားသွားသောကျောင်းသားအခန်းဆီ ဂမူးရှုးထိုး ထွက်သွားလိုက်သည်။ ရွှေပြည်အေးဆောင် အပေါ်ထပ် အောင်မင်္ဂလာဆောင်ဘက်အခြမ်းကအခန်းကို ရောက်တော့ အခန်းတံခါးပိတ်ထားပါသည်။ အိပ်နေဟန်တူသည်။ အပြင်ကသော့ခတ်မထားတာမို့ အတွင်းမှာ လူရှိနေကြောင်း ထင်ရှားပါသည်။ ကျွန်တော်အခန်းတံခါးကို ၃-၄ ချက် ဆောင့်ကန်ပစ်လိုက်သည်။ ကျွန်တော့် ကန်ချက်က ထိုစဉ်က ကမ္ဘာကျော် နာမည်ကြီးဘောလုံးသမား မာရာဒိုနာ ထက်တောင်ပြင်းသွားသလားမသိပါ။ အခန်းထဲက သကောင့်သား တံခါးကို ဝုန်းကနဲဖွင့်ပြီး ကျွန်တော့်အား စားမတတ်ဝါးမတတ် စူးစူးရဲရဲ ကြည့်နေ ပါသည်။

''ဘာဖြစ်တာလဲကွ...ဘယ်လောက်များများသေရေးရှင်ရေးဖြစ်နေလို့ အခန်းတံခါးကို လာပြီး ခြေထောက်နဲ့ ကန်ရတာလဲ...မင်းလူမှုရေးနားမလည်ဘူးလား''

ဟောဗျာ၊ ငပြူးကပြဲ။ ကျွန်တော် သူ့ရဲ့ဒေါသအငွေ့တွေထွက်နေသည့် မျက်လုံးကို သူ့ထက်ပိုသော အလျှံညီးညီး ဒေါသမီးတောက်မီးလျှံတို့ဖြင့် ပြန်ကြည့်လိုက်သည်။

''ဘယ်မလဲ...မင်းငါ့ဆီက ငှားသွားတဲ့မဂ္ဂဇင်း''

သူ ကျွန်တော့်အပြောကြောင့် ကြောင်အမ်းအမ်းဖြစ်သွားသည်။

'' မင်းစာအုပ်ပြန်မပေးဘဲ နေမှာမို့လား...မင်းကအရေးတကြီးပြန်လာတောင်းရအောင်''

''ငါ့ပစ္စည်းငါပြန်တောင်းတာကွာ...မင်းအပိုတွေပြောမနေနဲ့''

ကျွန်တော့်ဒေါသက ခေါင်းဖျားထိနေပြီဆိုတော့အသံကလဲ တုန်ခါလှိုင်းထပြီး လိုသည်ထက်ပိုကျယ် နေသည်။

သူက ကုတင်ခြေရင်းရှိ သေတ္တာပေါ်ကနေ ရှုမဝမဂ္ဂဇင်းစာအုပ်ကို ပစ်ပေးတော့ ကျွန်တော်က ဖမ်းယူပြီး ဒရောသောပါးပဲ စာမျက်နှာတွေကို လှန်လှောလိုက်သည်။ တွေ့ပြီ စုတ်ဖြဲထားသောနေရာ။

'' ဟော့ဒီမှာ မင်းစာရွက်တွေ စုတ်ဖြဲထားတယ်... အဲ့ဒီစာရွက်တွေငါဘယ်မှာတွေ့ခဲ့တယ်မှတ်လဲ... အိမ်သာထဲမှာကွ...အိမ်သာထဲမှာ ...တောက် အောက်တန်းကျတဲ့ကောင်''

''ဘာကွ ...မင်းစာအုပ်တစ်အုပ်နဲ့ ပေါက်ကွဲနေရအောင် မင့်စာအုပ်က ဘယ်လောက်တန်လို့လဲ''

''စာအုပ်တန်ကြေးကို ပိုက်ဆံနဲ့လာဖြတ်မနေနဲ့၊ သူများဆီကစာအုပ်ကို အလွယ်တကူငှားပြီး အိမ်သာသုံး စက္ကူလုပ်သွားတဲ့ မင်းရဲ့အောက်တန်းကျတဲ့လုပ်ရပ်၊ တက္ကသိုလ်ကျောင်းသားဖြစ်ပြီး လမ်းဘေးကလေကချေလို ပြုမူတဲ့မင်းလုပ်ရပ်တွေကို ရွံလွန်းလို့လာပြောတာ...မင်းလိုကောင်မျိုးနဲ့ ငါတက္ကသိုလ်မှာအတူတက်ခဲ့ဖူးတယ် ဆိုတာ နောင်တစ်ချိန်ပြောရမှာတောင်ပါးစပ်သနတယ်၊ ရှက်တယ်။ ဒါပဲ မင်းငါ့စာအုပ်ပြန်လျော်ပေး။ နောက် ဘယ်တော့မှ ငါနဲ့လာမဆက်ဆံနဲ့။''

ကျွန်တော် မီးကုန်ယမ်းကုန်ပေါက်ကွဲပြီး ပြန်ထွက်လာလိုက်သည်။

'' တောက် ...စာအုပ်များ သူ့အမေလင်ကျနေတာပဲ ဖြစ်နေလိုက်တာ''

ကျွန်တော်ကြားလိုက်ရပေမယ့် ပြန်ပြီးချဲမနေတော့ပါ။

''ဟုတ်တယ်ကွာ စာအုပ်ကိုအဖေလိုချစ်တာ'' စိတ်ထဲကပြောသည့်စကား။ သည်မောင်ကြားလဲ ခံစားတတ်မယ်မထင်ပါဘူး။

x x x x x

လွန်ခဲ့သောနှစ် ၃ဝ ခန့်က စာအုပ်တစ်အုပ်နှင့်ပတ်သက်ပြီး မမေ့နိုင်သောဖြစ်ရပ်ပဲဖြစ်သည်။ မဂ္ဂဇင်း စာမျက်နှာများကို အိပ်သာသုံးစက္ကူအဖြစ် အသုံးပြုခဲ့သည့် စိတ်ဓါတ်ရေးရာ ဖိနပ်အောက်ခြေသို့ ရောက်ခဲ့သော သူ့ကို ကျွန်တော်စဉ်းစားပုံဖေါ်ကြည့်တော့ ပါးပါးလေးတောင်ဖေါ်လို့မရ။ ဘယ်မေဂျာ၊ နာမည်ဘယ်သူ၊ ဘယ်မြို့က၊ ပုံပန်းဘယ်လို...ရေးရေးမျှ ပေါ်မလာတော့။

သေချာပါသည်။ အဲ့သည် အချိန်ကတည်းက စာအုပ်တွေအပေါ်ယုတ်ညံ့သောစိတ် ထားခဲ့သော သူသည် ကျွန်တော့် ဒေါသစက်ကွင်းထဲမှာ အရည်ပျော်ကျပြီး ကျွန်တော့်အာရုံထဲမှ လွတ်ထွက် သွားခဲ့တာပဲဖြစ်ပါမည်။

(နှစ်)

ကျွန်တော်တို့ ကုမ္ပဏီသို့ CEO အသစ်ရောက်လာပြီး တစ်ပတ်လောက်မှာ ကျွန်တော်ကိုခေါ်တွေ့သည်။ ကျွန်တော် CEO ရုံးခန်းထဲရောက်၊ ဆက်တီခုံလေးမှာထိုင်တော့ ပုဂ္ဂိုလ်က ဆုံလည်ကုလားထိုင်မှထကာ ကျွန်တော်နှင့် မျက်နှာချင်းဆိုင်ခုံတွင်လာထိုင်သည်

''ကျွန်တော့်ကို မှတ်မိလား၊ ကျွန်တော်တို့မန္တလေးတက္ကသိုလ်မှာအတူတက်ခဲ့ဖူးတယ်လေ''

ကျွန်တော် သူ့မိတ်ဆက် ပြောစကားအရ ကျောင်းနေဖက်သူငယ်ချင်းတွေထဲက ဘယ်သူဖြစ်မလဲ၊ အပြေးအလွှားစဉ်စားသည်။ သို့သော် ဘယ်လိုမှအမှတ်မရ။

'' ဆောရီး ..ကျွန်တော်မမှတ်မိဘူးဖြစ်နေတယ်...ဘယ်မေဂျာကလဲဗျာ၊ အဆောင်နေခဲ့သေးလား''

ဟက် ကနဲ သူရယ်တော့ သူ့ရယ်သံက ခြောက်သွေ့သလိုပါပဲ၊ အသက်မပါဟု ခံစားမိသည်။

''အေးဗျာ ...ကျွန်တော်ကလည်း ကျောင်းပြီးကတည်းက သင်တန်းပါသွားတာဆိုတော့ ...အင်း ..နှစ် ၃ဝ လောက်ကြာရောပေါ့။ ကုမ္ပဏီမှာ ရှယ်ယာထည့်ထားတာကြာပြီ၊ အခုမှ ကုမ္ပဏီကို ဝင်လာတာ၊ တိုက်တိုက်ဆိုင်ဆိုင်ဗျာ ဒီမှာခင်ဗျားနဲ့လာတွေ့ရတယ်''

သူပြောနေသည့်အချိန်မှ ကျွန်တော့်မှတ်ဥာဏ်ရှိ သိမ်းဆည်းထာသော ရုပ်ပုံများကို ဖော်ကြည့်နေမိသည်။ ကျွန်တော့်မှတ်ဥာဏ်တွေ ချို့ယွင်းနေပါပြီ။

'' ကျွန်တော်တို့နှစ်က ကျောင်းသားနည်းတယ်၊ ကျွန်တော်နဲ့ Same Batch ဆိုရင် CEO ကို မှတ်မိဖို့ ကောင်းတယ်။ အခုကျွန်တော် ဘယ်လိုမှ ပုံဖော်လို့မရဘူးဗျာ''

'' အဟင်း ..ခင်ဗျားမမှတ်မိပေမယ့် ကျွန်တော်ကတော့ ခင်ဗျားကို အမြဲတမ်းသတိရမှတ်မိနေတယ်၊ ခင်ဗျားသတိရအောင် ကျွန်တော်အစဖော်ပေးမယ်။ ကျွန်တော် ရွှေပြည်အေးဆောင် အပေါ်ထပ်မှာနေခဲ့တယ်။ ခင်ဗျားဆီကနေ မဂ္ဂဇင်းတစ်အုပ်ငှားဖတ်ခဲ့ဖူးတယ်လေ''

x x x x x

လွန်ခဲ့သောနှစ် ၃ဝ ကကျွန်တော် ပြောခဲ့သည့်

'' မင်းလိုကောင်မျိုးနဲ့ ငါတက္ကသိုလ်မှာ အတူတက်ခဲ့ဖူးတယ်ဆိုတာ နောင်တစ်ချိန်ပြောရမှာတောင် ပါးစပ်သနတယ်၊ ရှက်တယ်'' ဆိုသောစကားကို အတိအကျပြန်မှတ်မိနေသည့်အတွက် ကိုယ်မှတ်ဥာဏ်ကို အံ့သြလို့နေသည်။

အခုတော့ အခန်းထဲရှိ လေအေးစက်က အအေးလှိုင်းထုတ်တာလား၊ အပူလှိုင်းထုတ်တာလား ဝေခွဲရ ခက်လောက်အောင် ကျွန်တော့်မှ ချွေးစို့လို့နေပါသည်လေ။

ရဲသျှမ်း